भारतका मानव संसाधन विकास मन्त्रीले संसारकै सबैभन्दा सस्तो ल्यापटप कम्प्युटर सार्वजनिक गरेका छन् । यसको मोल ३५ डलर अर्थात् २६ सय नपाली रुपैयाँजति पर्छ ।

यो ल्यापटपमा टचस्क्रिन, वेबसाइट हर्ने ब्राउजर, पिडिएफ रिडर, भिडियो कन्फ्रेन्सिङ सुविधा छन् । साथै आवश्यकताअनुसार नयाँनयाँ सुविधा थप्न सकिने व्यवस्था पनि छ । यो लिनक्स अपरेटिङ सिस्टममा चल्छ । सन् २०११ सम्म यासको मोल घटाएर २० डलर र आखिरमा १० डलर अर्थात् ७५० रुपैयाँ पुर्याउने लक्ष छ ।

यो सस्तो ल्यापटपको निर्माण इन्डियन इन्स्टिच्युट अफ टेक्नोलजी र इन्डियन इन्स्टिच्युट अफ साइन्सका अनुसन्धान टोलीहरुले गरेका हुन् । भारत सरकारले विद्यालय शिक्षामा वाषिर्क बजेटको ३ प्रतिशत खर्च गर्ने गरेको छ । भारतको जनसंख्या एक अरब बीस करोड छ र त्यहाँको साक्षरता ६४ प्रतिशत पुगेको छ ।

स्रोतः प्रथम बुक्स, जुलाई २४, २०१०

काठमाडौं, २९ असार
चार वर्षअघिदेखि रोकिएको साझा पुरस्कार, लोकसाहित्य पुरस्कार, बालसाहित्य पुरस्कार र गरिमा सम्मान पुरस्कार विभिन्न विधामा कलम चलाइरहेका स्रष्टाहरूलाई भानु जयन्तीको अवसरमा असार २९ गते वितरण गरियो । संस्कृतिविद् सत्यमोहन जोशी तथा कृषि तथा सहकारी मन्त्री मृगेन्द्रसिंह यादवले सम्मानित स्रष्टाहरूलाई पुरस्कार प्रदान गर्नुभएको थियो ।
प्रकाशनले ‘हरि अधिकारीका कविता’ कृतिका लागि कवि हरि अधिकारीलाई २०६३, ‘साहित्य र समाज’ कृतिका लागि ऋषिराज बराललाई २०६४, ‘प्रेतकल्प’ उपन्यासका लागि नारायण ढकाललाई २०६५ र ‘संक्रमणको साहित्य र समकालीनता’ शीर्षक कृतिका लागि पुरुषोत्तम सुवेदीलाई २०६६ सालको साझा पुरस्कार प्रदान गरेको थियो ।
त्यसैगरी लोकसाहित्य पुरस्कारतर्फ ‘नेपालमा प्रचलित नृत्य र नृत्यनाटिकाहरू’ शीर्षक ग्रन्थका लागि डा. मोतीलाल पराजुलीलाई २०६३, ‘लिम्बुवानका लोककथा’ शीर्षक ग्रन्थका लागि धनहाङ सुब्बालाई २०६५, ‘डोटी प्रदेशको लोकवाङ्मय कोश’ शीर्षक ग्रन्थका लागि  वासुदेव भट्ट ‘भाइसाब’लाई २०६६ को पुरस्कार प्रदान गर्यो ।
चार वर्षअघिदेखि नै रोकिएको साझा बालसाहित्य पुरस्कार ‘आमाचरी’ पुस्तकका लागि कवि अनिल पौडेल २०६३, ‘वनको दमकल’ पुस्तकका लागि विनय कसजू २०६४, ‘भुइँचालोबारे हजुरआमाको कथा’ पुस्तकका लागि शान्तदास मानन्धर २०६५ र ‘बगियाक गाछ’ शीर्षक पुस्तकका लागि देवेन्द्र मिश्रलाई २०६६ को पुरस्कार प्रदान गरियो।
त्यसैगरी, गरिमा सम्मान पुरस्कार पनि मंगलबार नै प्रदान गरिएको थियो । ‘गजल’ शीर्षक गजलका लागि गजलकार ललिजन रावल र ‘शब्दको भ्वाङ’ शीर्षक व्यंग्य निबन्धका लागि रुद्र खरेल २०६३, ‘टपरीमा राक्षस’ कविताका लागि कवि श्यामल र ‘ऐंजेरु’ कथाका लागि राजेन्द्र विमल २०६४, ‘साझा हाम्रो एकता’ कविताका लागि रेखा सुवेदी र ‘बेतुक’ कथाका लागि राजेन्द्र पराजुली २०६५ तथा ‘खोइ गर्भ खोज’ र ‘स्वपीडा’ शीर्षक दुई कविताका लागि कणाद महर्षि र ‘भारतका उत्तरपूर्वीय राज्यमा नेपाली आख्यानको विकासक्रम’ समीक्षालेखका लागि अविनाश श्रेष्ठलाई २०६६ को गरिमा सम्मान पुरस्कार प्रदान गरिएको थियो ।
कार्यक्रममा पुरस्कृत व्यक्तित्व र कृतित्वका बारेमा झलक सुवदी र रमेशप्रसाद भट्टराईले मन्तव्य व्यक्त गर्नु भएको थियो ।

साझा प्रकाशनकी अध्यक्ष तथा महाप्रबन्धक ममता झाले चार वर्षेखि साझा पुरस्कारलगायत अन्य पुरस्कारहरू वितरण गर्न केही कठिनाइ भएको र आउँदा दिनमा यसलाई निरन्तरता दिने र पुरस्कारको रकम बढाउने भन्नुभयो । प्रमुखअतिथि सत्यमोहन जोशीले साहित्यकारहरूको संस्था साझा प्रकाशनलाई सरकारले उचित ध्यान नदिएकोमा रोष प्रकट गर्दै यसलाई बलियो बनाउन सबैसँग अनुरोध गर्नुभयो ।

काठमाडौं, ३१ असार । बालसाहित्य लेखक एवं पत्रकार विजयराज आचार्यलाई तन्नेरी त्रैमासिक पत्रिकाले ‘पुष्कर गौतम बालसाहित्य पुरस्कार-२०६६’ प्रदान गरेको छ ।
उहाँको साझा प्रकाशनबाट प्रकाशित ‘बाटुली’ बालकथाकृतिका लागि सो पुरस्कार प्रदान गरिएको हो । लेखक विजयराज आचार्य नेपाली बालसाहित्यको प्रवर्धनका निम्ति सक्रिय हुनुहुन्छ । उहाँका मौलिक, अनुवाद र सम्पादन गरी ३६ वटा कृतिहरु प्रकाशित भएका छन् । उहाँले ‘हाम्रो बालबगैचा’ मासिक बालपत्रिकाका सम्पादन र प्रकाशन गरिरनु भएको छ  र विवेक सिर्जनशील प्रकाशनका कार्यकारी अध्यक्ष हुनुहुन्छ ।

भारतको कोलकोता शहरमा भाडामा पुस्तक लिएर पढन चाहनेहरुका लागि अनलाइनबाट पुस्तक अर्डर लिएर घरघरमा पुर्याउने सेवा सुरु भएको छ ।

जेल्फ नामक किताब भाडामा दिने संस्थाले आफ्नो वेबसाइट http://self.in मा किताबहरुको सचित्र सूची राखेको छ । पाठकले आफूले रोजेको पुस्तक अनलाइनबाट अर्डर गर्छ र संस्थाले घरमै पुस्तक ल्याइदिन्छ । पुस्तक पढिसकेपछि संस्थाले नै पहिलेको पुस्तक फर्काउँछ र नयाँ पुस्तक ल्याइदिन्छ । यसको लागि मासिक तथा वाषिर्क शुल्क तिर्नु पर्छ । कतिवटा किताब कतिकति दिनमा पढ्ने भन्ने आधारमा शुल्क तोकिएको छ । एक महिनाको भारतीय रुपैयाँ पाँचसय, छ महिनाको १८०० वा वर्षको ३३०० तिर्यो भने जति पनि किताब पढ्न पाइन्छ । हेनुस्ः  http://xelf.in/membership-plan.php

काठमाडौं, जेठ, २०६७

नेपाली बालसाहित्य सर्जकहरूले नेपाली बालकथा वाचन परम्पराको प्रवर्ध्दन गर्ने उद्देश्यले बालकथाकार ध्रुव घिमिरेको अध्यक्षतामा कथा वाचक समाज गठन गरेको छ । समाजको उपाध्यक्ष कृष्ण शाह ‘यात्री’, महासचिव कृष्णदीप सिग्देल, सचिव यशु श्रेष्ठ, कोषाध्यक्ष राजेन्द्र श्रेष्ठ र सदस्यहरू मेनुका राई, सौरभ किरण श्रेष्ठ, जनार्दन बराल र भीष्म के.सी. हुनुहुन्छ ।

लेखक उँटमा पुस्तक राखेर गाउँतिर जाँदै

हिमाली क्षेत्रमा मोटरबाटो नपुगेको ठाउँमा चौँरी गाईले भारी बोकेजस्तै चिनसँग जोडिएको विशाल देश मंगोलियामा उँटले भारी बोक्छ । त्यहाँका टाढाटाढाका र दुर्गम गाउँमा बस्ने केटाकेटीको जीवनमा खुशी थप्न दासदोङदोग नाम गरेका एक जना लेखकले उँटको पिठ्युँमा किताब बोकाएर गाउँका बालबालिकालाई बाँड्ने गरेका छन् । गाउँका बालबालिकाले छुट्टीका बेलामा राम्रा र रमाइला पुस्तक पढ्न पाउन भनेर उनले सन् २००२ देखि घुम्ती पुस्तकालय परियोजना चलाएका हुन् ।

उनले गाउँमा पुस्तक पुर्याउन उँटका साथै घोडा, गधा, गाई, बाह्रसिंगे जरायोजस्ता जानवरको पनि उपयोग गर्ने गरेका छन् । उनले यस्तो काम थालेको १८ वर्षभयो । यो काममा उनलाई त्यहाँका लेखक, कलाकार, शिक्षक, विद्यार्थी, सामाजिक कार्यकर्ता र उनका परिवारका सदस्यहरूले पनि सघाइरहेका छन् । लेखक दासदोङदाग आफैले पनि १०८ शीर्षकका बालपुस्तक लेखिसकेका छन् । उनले अरु भाषामा छापिएका बालपुस्तक मंगोलियन भाषामा उल्था पनि गर्छन् ।

स्रोत/साभारः प्रथम बुक्स, जुन ९

तपाईँहरूलाई थाहैछ नेपालका दुर्गम गाउँहरूमा पाठ्यपुस्तक बेलामा पुग्दैनन् । स्कुलमा पढ्नु पर्ने किताब समयमा नपुग्ने ठाउँमा पाठ्यक्रम बाहिरका कथा, गीत, उपन्यासका पुस्तकहरू कसरी पुग्लान् ?

पुस्तक नपुग्ने गाउँका बालबालिकाहरूमा पुस्तक पढ्ने बानी बस्दैन । पुस्तक पढ्ने चाहना र इच्छा पनि मर्छ । पुस्तकबाट बंचित हुनु भनेको हाम्रो भविष्यका आधारहरूलाई अयोग्य र समाजको बोझ बनाउनु सरह हो ।

हामी पुस्तक पढ्ने बानी बसेका र पुस्तक पढिसकेका सचेत नागरिकहरूले दुर्गम गाउँमा बस्ने बालबालिकालाई पुस्तक पठाएर गुन लाउन सक्छौँ । यो गुन भनेको आफू र आफ्नै देशको लागि लगाउने गुन हो ।

हालै स्याटेलाइट नामक संस्थाले नेपालका केही जिल्लाका गाउँका बालबालिकाका लागि पुस्तक संकलन गरेर पठाउने काम गर्न लागेको छ ।

दुर्गम स्थानमा बस्ने बालबालिका मात्रै होइनन् शिक्षक शिक्षिकाहरू पनि पुस्तक पढ्नबाट बंचित छन् । यसैले बालबालिकालाई रमाइलो लाग्ने र ज्ञान दिने पुस्तकका साथै शिक्षक शिक्षिकाका लागि पनि उपयोगी पुस्तक तपाईँले स्याटेलाइटमार्फ् दान दिन सक्नु हुन्छ ।

काठमाडौँमा पुस्तक दिन चाहनुहुनेहरूले मोबाइल फोन नं. ९८५१०३२२१३ मा र पोखरामा फोन नं. ९८४६०५९३८८ मा सम्पर्क राख्न सक्नु हुन्छ । इमेल ठेगाना होः satelite1953@gmail.com

पाल्पा, तानसेन जेठ १० गते ।

धवल पुस्तकालय भवन

पाल्पा तानसेन धवल पुस्तकालयमा पाल्पाका बालसाहित्य पाठक सर्जक तथा विद्यार्थीहरूसँग बालसाहित्य सर्जक विनय कसजूले अन्तरक्रिया गर्नु भयो । सो अवसरमा उहाँले नेपाली बालसाहित्यको अवस्था, गएको फागुनमा कास्की जिल्लाको घान्द्रुकमा भएको नेपाल बालसाहित्य समाजको सम्मेलनले पारित गरेको घोषणापत्रको बारेमा बताउनु भयो । साथै अहिलेको विश्वमा कस्तो बालसाहित्यको सिर्जना भइरहेछ भन्ने नमुनाको रूपमा केही छोटा चलचित्र भिडियो पनि देखाउनु भयो । आधुनिक मिडियाले बालबालिकालाई आफ्नो हितको लागि प्रयोग गर्ने सम्भावना बढेको विषयमा पनि सचेत गराउनु भयो ।

यस अवसरमा बालसाहित्य सर्जक कर्णबहादुर बानियाले पाल्पामा बालसाहित्यको विकास प्रारम्भिक अवस्थामा रहेको र यसका लागि साहित्यकार र साहित्य लेखनमा रुचि राख्ने विद्यार्थीहरूले मिलेर ठोस काम गर्नु पर्ने विचार व्यक्त गर्नु भयो । धवल पुस्तकालयले आयोजना गरेको सो कार्यक्रमको अध्यक्षता पुस्तकालयकाअध्यक्ष युवराज पौड्यालले गर्नु भएको थियो । कार्यक्रम संचालक पुस्तकालयका महासचिव राजेशकुमार अर्यालले गर्नु भएको थियो ।

बालसाहित्य र बालकथा भिडियो प्रदर्शन

दाङ घोराहीको दीपशिखा माध्यमकि विद्यालयमा कक्षा पाँचमा पढ्ने असीम रेग्मीले आफ्नै ब्लग सुरु गरेका छन् । बालबालिकालाई सिर्जनशील बन्न सघाउनु, स्वदेश र विश्वका बालसाहत्यिसँग परिचित गराउनु, आधुनिक आमसंचारका माध्यमहरूका बारेमा सजग बनाउनु, अभिभावकहरूलाई बालबालिकाको हक र हितप्रति सचेत बनाउनु यो ब्लगको उद्देश्य रहेको छ । हाल यो ब्लगमा बालबालिकाबारे एउटा लेख र बालकथा र बालकविता राखिएका छन् । ब्लगको ठेगाना यस्तो छः www.khushikosansar.plogspot.com